呢一間卅二公館 Mott 32我喺新加坡食過一次當時覺得啲嘢好好食，知道原來佢喺香港都有分店，所以就拉埋Mr Honey一齊去試吓🫶🏻大家有興趣記得save底個post，咁就唔會揾唔返啦♥️
你打電話去預約嘅時候，佢會問你想唔想預留一份叉燒同埋一隻片皮鴨，呢兩款都係佢哋嘅名菜，所以我覺得必試。 用餐時間係兩個鐘頭。
🍽食物👇🏻
⭐️42天飼養北京片皮鴨 $980: 勁好食，係我食過最好食嘅片皮鴨😊佢冇半隻，只係得一隻，所以預四個人或以上去食會比較好啲。 首先師傅會片左一塊皮叫你點黃糖去食，好特別呀，入口即溶！ 之後就食片皮鴨，我哋兩個一路食都話好好食，同埋覺得佢冇平日嘅片皮鴨咁肥膩，超級推介👍🏻
⭐️蜜汁頂級西班牙黑毛豬叉燒 (每天限量)$350: 呢個叉燒我覺得簡直係全宇宙最好食嘅叉燒，初初見到係厚切有少少擔心會唔會好難咬得開，但係點知真係非常嫰同juicy，入口即溶呀😆呢個叉燒係必點👍🏻
⭐️脆皮燒腩仔 $220: 呢個燒腩仔我哋喺新加坡都有食，又係覺得好好食，所以返嚟再試，佢個脆皮真係超級無敵脆，雖然有肥膏，但係食落完全唔覺得肥膩，仲要佢切到細細粒，一口一粒好正，都係必點👍🏻
⭐️燈影牛肉 $145: 呢個我見佢個名好特別就試吓，嚟到既時候發現佢個賣相好精緻，食落好有驚喜，因為佢係極度薄身嘅Angus Beef，入口超級脆，我覺得呢個餸酒一流，好特別，值得試👍🏻
⭐️原味鮮肉小籠包 $95/4pcs: 小籠包喺Mr Honey叫，佢想睇吓呢度嘅小籠包同佢最愛嘅鼎泰豐小籠包究竟邊個會勝出🤣呢度贏咗少少，佢都係皮薄餡靚，但係小籠包入邊嘅湯汁味道比較濃郁，所以成隻小籠包嘅味更加突出
⭐️金腿龍蝦粿 $150/1pc: 見到呢個價錢就知佢呢一粒嘅size唔細，唔係我哋平時食開嘅蝦餃啊！ 呢粒係龍蝦餃，所以係大粒好多，喺條tube入面嘅係龍蝦汁，食之前幫隻龍蝦餃打咗龍蝦汁針先，咁皮落就會啖啖龍蝦肉同龍蝦汁嘅味道，好鮮味
⭐️黑豚肉松露鵪鵓蛋燒賣 $80/2pcs: 呢個喺香港唔再容易食到嘅鵪鶉蛋燒賣加咗少少肉松露，對比底下呢個冇其他咁特別，但係如果掛住鵪鶉蛋燒賣既話絕對可以叫😊
🍹飲品👇🏻
我哋有叫佢Cocktail，兩款都好好飲，唔會過甜，而且酒味唔會搶晒風頭。 但係我因為掛住食叉燒唔記得影低佢哋個名，所以冇得特別分享我哋嗰日飲咗啲咩🤣
🍰甜品👇🏻
⭐️石榴金露 $80/位: 呢個好特別，平日都係食楊枝甘露，今次就食石榴金露，我覺得呢個好清新好好味，亦都有好重嘅石榴味👍🏻
⭐️香芒椰汁糯米卷 $80/4pcs: 呢個我淨係見到芒果兩隻字都着晒燈，所以又叫嚟試下，好重芒果味，但係又唔heavy，好好食👍🏻
💁🏻♀️一定要預約，唔預約嘅話有機會冇位。服務都體貼，但係又唔會過分熱情。 我哋點咗咁多樣嘢食，其實我哋覺得全部都好好食。 一路食我哋已經講話下次要再嚟過，你就可想而知我哋有幾鍾意佢哋嘅食物質素。 當然價錢嚟講唔係一般大眾化嘅價錢，佢哋走比較高端嘅路線，所以環境都好靚，同埋唔會同隔籬坐太近。我覺得佢嘅食物質素同埋服務都對得住佢個價錢。唯一一樣嘢就係燈光比較暗(有浪漫情調)，想打卡影相就有啲難度，同埋得兩個鐘頭用餐時間，如果你想同人慶祝生日或者慶祝一啲特別日子想坐得耐啲吹埋水嘅話，呢度未必係一個好好嘅選擇， 但係如果你話純粹食環境食食物嘅話，我好推介大家去試吓👉🏻可以save低呢個post當參考😌
🤔綜合評分(10分滿分啦)：
環境: 9/10
食物: 9/10
服務: 9/10
抵食: 8/10
整體: 8.75/10
🍴餐廳：卅二公館 Mott 32
📍地址：中環德輔道中4-4A號渣打銀行大廈地庫
☎️電話：28858688
📲有無得Open Rice book位：冇 (link)
